AP spår norsk gulljubel på 11 av 12 langrennsdistansar

Det amerikanske nyheitsbyrået trur Noreg kjem til å ta 21 gull, 9 sølv og 11 bronsemedaljar i OL. Dersom AP har sett inn i den rette spåkula, går det mot eit realt gullras i langrenn i Sør-Korea.

Martin Johnsrud Sundby blir spådd å vinne både 15-kilometeren, femmila og skiathlon.

AP tippar Johannes Høsflot Klæbo som vinnar av sprinten, mens det norske herrelaget får gullstempelet både på stafetten og lagsprinten.

Klæbo er i tillegg spådd å ta bronse i skiathlon, mens Finn Hågen Krogh er tippa med same valør på sprinten.

På kvinnesida er Marit Bjørgen spådd å vinne 10-kilometeren og tremila, mens Maiken Caspersen Falla blir sett som den største favoritten på sprinten. I tillegg har AP plassert Noreg øvst på pallen både på stafetten og i lagsprinten, også på kvinnesida.

Den einaste langrennsdistansen AP ikkje trur ein norsk utøver tar gull på, er skiathlon for kvinner. Der har dei den svenske løparen Charlotte Kalla som favoritt før Marit Bjørgen og Heidi Weng.

Dersom spådommane slår til, tar Noreg 11 av 12 moglege gull og 17 av 28 moglege medaljar i langrenn totalt. Heidi Weng er i tillegg spådd å ta sølv på tremila og bronse på 10-kilometeren.

Svindal-gull

I alpint tar Aksel Lund Svindal, ifølgje AP, det første norske OL-gullet i utfor i historia, mens Kjetil Jansrud er tippa å ta same medaljen i super-G.

Nyheitsbyrået trur Henrik Kristoffersen tar sølv i både slalåm og storslalåm, mens Johannes Thingnes Bø tar gull på skiskyttarsprinten og på 20-kilometeren. I tillegg språr dei norsk gull på skiskyttarstafetten for menn og i blanda stafett og bronse på stafetten for kvinner.

Daniel-André Tande og Johann André Forfang vann dei to siste verdscuprenna i hopp før OL, men hos AP får ingen av dei to får plass på pallen i dei individuelle OL-renna.

Det gjer likevel Maren Lundby, som blir spådd å ta gull i normalbakken.

AP tippar likevel at Noreg tar sølvet i lagkonkurransen for menn.

Resten av medaljane

Andre norske OL-medaljar, spådd av AP:

Gull: Johanne Killi, slopestyle (fristil), Jan Schmid, individuelt normalbakke (kombinert), lagkonkurranse (kombinert).

Sølv: Johannes Thingnes Bø, jaktstart og fellesstart (skiskyting), Håvard Lorentzen, 500 meter (skøyter), lagtempo menn (skøyter).

Bronse: Aksel Lund Svindal, super-G (alpint), Emil Hegle Svendsen, fellesstart (skiskyting), Øystein Bråten, slopestyle (fristil), Jørgen Graabak, normalbakke (kombinert), Schmid, stor bakke (kombinert), Sverre Lunde Pedersen, 5000 meter (skøyter).

(©NPK)

Nyheitsbyrået AP gir Martin Johnsrud Sundby gullstempel på tre OL-distansar. Foto: Cornelius Poppe / NTB scanpix