Bio tatt i eid som Sierra Leones president

Valkommisjonen erklærte Julius Maada Bio (53) frå Sierra Leones folkeparti (SLPP) til vinnar av presidentvalet i landet. Natt til torsdag vart han tatt i eid.

Opposisjonskandidaten Bio, som i nokre månader i 1996 leidde militærjuntaen som styrte landet, vann valet laurdag med 51,81 prosent av stemmene, opplyste valkommisjonen.

Kort tid seinare vart han tatt i eid, saman med den nye visepresidenten Mohamed Juldeh Jalloh. Dette er Bios andre forsøk på å bli valt til president, i 2012 tapte han valet.

Denne gongen gjekk det vegen for den tidlegare brigaderen, som slo Samura Kamara frå regjeringspartiet Heile folkets kongress (APC). 67 år gamle Kamara, som har vore utanriksminister sidan 2012, fekk 48,19 prosent av stemmene.

Bio vann også så vidt første valomgang 7. mars, etter nærmast dødt løp. Han fekk 43,3 prosent og Kamara 42,7 prosent av stemmene.

Over 2,5 millionar menneske, 81 prosent av dei røysteføre i landet, stemte.

Sierra Leone har drygt 7 millionar innbyggjarar og er eitt av dei fattigaste landa i verda. Frå 1991 til 2002 herja ein blodig borgarkrig i landet, som kosta titusenvis av menneske livet.

(©NPK)

Julius Maada Bio frå Sierra Leones folkeparti (SLPP) er ny president i landet. Foto: Cooper Inveen / AP / NTB scanpix