Framgang for høgresida i Colombia
Høgreparti som er kritiske til fredsavtalen gjorde det sterkt under valet i Colombia søndag, men sikrar seg ikkje fleirtal.
Valet av nasjonalforsamling er det første etter at den tidlegare FARC-geriljaen la ned våpena og oppretta sitt eige parti som følgje av fredsavtalen med regjeringa.
Det var tidlegare president Alvaro Uribes parti, høgreorienterte Centro Democrático, som fekk størst oppslutning. Partiet sikra seg 19 sete i senatet og 33 i underhuset.
Alvaro har markert seg som ein skarp motstandar av fredsavtalen med FARC, og mange har frykta at den skjøre freden i landet kan bli sett på prøve dersom delar av avtalen blir sett til side.
- Justeringar
Framgangen til høgresida er likevel ikkje stor nok til å sikre fleirtal mot fredsavtalen.
- Det er ingen store endringar, det er justeringar, seier Frederic Masse ved Externado University til AFP.
FARC har som følgje av fredsavtalen frå 2016 krav på minst ti av dei 268 seta i Colombias nasjonalforsamling. Det nydanna politiske partiet deira, Fuerza Alternativa Revulicionaria del Comun (også forkorta til FARC), ser likevel ikkje ut til å sikre seg nokon plassar utover dette.
Lita oppslutning om FARC
Berre 0,35 prosent av stemmene i senatsvalet og 0,22 prosent av stemmene i valet av representantar til underhuset gjekk til FARC. Likevel var det viktig for mange tidlegare FARC-medlemmer å kunne stemme på si eiga rørsle.
- Det er første gong i mitt liv eg stemmer, og eg gjer det for fred, seier Pablo Catumbo, ein tidlegare FARC-leiar som var sikra ein plass i senatet.
I mai skal landet velje ny president når Juan Manuel Santos går av. Centro Democráticos kandidat, Ivan Duque, blir sett på som favoritt framfor sosialisten Gustavo Petro.
(©NPK)
Stemmegjeving ved eit vallokale i Bogota. Foto: Fernando Vergara / AP / NTB scanpix.