Frp-kjelder til NRK: Partiet kan komme til å støtte rein Høgre-regjering viss Listhaug blir vraka
Sentrale Frp-arar opnar for at partiet kan gå ut av regjeringa og så støtte ei rein Høgre-regjering. Dette for å hindre Jonas Gahr Støre som statsminister.
Sjølv om Frp i mange år har stått fast på at dei ikkje vil støtte ei regjering dei ikkje sjølve er med i, så opnar no fleire sentrale Frp-kjelder for ei revurdering av dette synet, ifølgje NRK.
Årsaka er at dei heller vil støtte ei Høgre-regjering enn at Jonas Gahr Støre blir statsminister.
- Det einaste som vel er bombesikkert, er at Frp ikkje kan bli noko støtteparti for ei Høgre-KrF-Venstre-regjering, seier ei regjeringskjelde til NRK.
Ei slik regjering må ha støtte både frå KrF, Venstre og Frp for å få gjennom saker i Stortinget.
- Dersom vi kjem i ein slik situasjon, blir det ein heftig og vanskeleg runde internt, gitt det vi har sagt før, og det som har skjedd. Men eg vil tru dei fleste også hos oss helst vil ha Erna og Høgre i regjering framfor Støre som statsminister, viss det kjem til det, seier ei stortingskjelde.
Frp-leiar Siv Jensen ønskjer ikkje å kommentere opplysningane.
(©NPK)
Fleire sentrale Frp-kjelder seier til NRK at dei heller vil støtte ei rein Høgre-regjering enn ei regjering med Jonas Gahr Støre (Ap).
Foto: Cornelius Poppe / NTB scanpix