Hovland blir yngste nordmann i ei PGA-turnering

Viktor Hovland (21) har sikra seg sponsorinvitasjon til ei PGA-turnering etter storspel i Florida.

Hovland representerer Miklagard golfklubb og Oklahoma State University. No skriv han norsk golfhistorie.

Tysdag vann han ei collegeturnering, som gjer at han får delta på PGA-touren neste år, truleg saman med sjølvaste Tiger Woods i Valspar Championship-turneringa, skriv Norsk Golf.

21-åringen blir den yngste nordmannen i ei PGA-turnering i golf gjennom tidene. Han vil også truleg rykke opp som den best rangerte amatørgolfaren i verda.

- Det er feitt. Arrangøren annonserte det før turneringa starta at det stod om ein PGA Tour-plass, pluss at det har vore slik dei siste åra, seier 21 år gamle Hovland til Norsk Golf.

Tidlegare har Henrik Bjørnstad og Thomas Nielsen vore i aksjon på PGA-touren. Bjørnstad var fast på touren frå 2006 til 2010, mens Nielsen deltok i ei turnering etter sponsorinvitasjon på slutten av 1990-talet.

- Det nivået Viktor spelar på akkurat no, er godt nok til å hevde seg på PGA-touren også, meiner trenaren for Team Norways amatørlag, Niklas Diethelm, i Norges Golfforbund.

(©NPK)

Den norske golfspelaren Viktor Hovland frå Miklagard Golfklubb og Oklahoma State University blir historisk. Han har vore den beste collegespelaren i USA så langt i 2018 og nærmar seg toppen av verdsrankinga for amatørar. For augneblinken er han rangert som Europas nest beste amatør, men når rankinglista blir oppdatert seinare denne veka, rykker han sannsynlegvis opp som Europas beste.
Foto: Benjamin A. Ward/NGF / NTB scanpix