Ingen NM-duell mellom Klæbo og Northug
Petter Northug og Johannes Høsflot Klæbo møtest ikkje til duell på ankeretappen på NM-sprinten i Alta torsdag.
Northug går opningsetappen for Strindheims førstelag og overlèt dermed den siste etappen til veslebror Even.
Johannes Høsflot Klæbo går som venta den siste etappen for Byåsen IL, mens Fredrik Riseth skal ut i duell mot Petter Northug på den første.
På ankeretappen får Klæbo selskap av blant andre landslagskollega Finn Hågen Krogh, som avsluttar stafetten på heimebane for Tverrelvdalen.
Didrik Tønseth (Byåsen 2), Sjur Røthe (Voss), Niklas Dyrhaug (Tydal) og Eirik Brandsdal (Kjelsås) avsluttar også lagsprinten for sine respektive klubbar.
Martin Johnsrud Sundby går opningsetappen for eit sterkt Røa-lag. Med seg har han Andrew Musgrave.
Emil Iversen skulle ha gått ankeretappen for Varden Meråker, men har trekt seg.
For eitt år sidan gjekk NM-gullet i lagsprint til Byåsens førstelag. Didrik Tønseth og Johannes Høsflot Klæbo utgjorde mannskapet til trønderklubben på Gålå. Lillehammer tok sølvet, mens Sundby og Musgrave gjekk Røa inn til bronsemedalje.
På kvinnesida vart det gull til Nes-tvillingane Lotta og Tiril Udnes Weng, og dei regjerande meistrane er med i det ypparste favorittsjiktet også i Alta torsdag.
Størst konkurranse får duoen truleg av Oppdal-søstrene Silje og Kari Øyre Slind, og BUL-duoen Heidi Weng og Martine Ek Hagen. Sistnemnde offentleggjorde onsdag at ho legg opp etter inneverande sesong.
(©NPK)
Petter Northug møter ikkje Johannes Høsflot Klæbo til duell i Alta torsdag. Foto: Eva Jonsson / Flyktningerennet / NTB scanpix