Joshua French: Lurt i felle i Kongo

Det er ni månader sidan den drapsdømte nordmannen kom tilbake til Noreg, sterkt prega av åtte år i kongolesisk fengsel. I eit intervju med NRK fortel Joshua French om det som skjedde ute i jungelen for nesten ni år sidan.

Ifølgje French hadde dei ein avtale om å møte nokon der sjåføren deira vart skoten, men hamna i ei felle.

Dei to nordmennene vart begge arresterte av kongolesiske militære og vart så sitjande i fengsel i Kongo. I august 2013 vart Moland funnen død på cella. 17. mai i fjor kom French tilbake til Noreg.

- Vi var absolutt ikkje på nokon gutetur. Vi var der på vegner av nokon. Vi skulle løyse eit lite oppdrag, før vi skulle reise ut av landet igjen. Det var formålet med heile turen. Oppdraget vi skulle løyse var «low risk», vi trudde dette skulle gå temmeleg greitt, fortel French no.

Sjåfør Abedi Kasongo, saman med Kasimu Aradjabu og Kepo Ailo, køyrer Moland og French. Dei drar frå Kisangani ved 18-tida og stoggar 109 kilometer aust for Kisangani.

French seier at det ikkje var kongolesarane som bad dei om å stogge bilen, slik han og Moland tidlegare har sagt. Det var nordmennene som bad sjåføren om å stoppe akkurat der.

- Vi stoppa for å treffe nokon. Der blir vi overfalne av det som kan ha vore regjeringssoldatar, seier han

Då dei stoppa langs vegen, vart det skote opp i lufta over hovuda på dei.

- Det var nok åtvaringar då om at vi skulle stå stille. Men vi var også armert med denne hagla, så Tjostolv losna skot. Det vart det svara på, og sjåføren vart treft, seier French.

Han seier han trur kongolesisk etterretning hadde halde auge med dei og at dei visste om møteavtalen denne kvelden. French meiner det var soldatar frå det kongolesiske militæret som venta på dei og som angreip då dei kom ut av bilen.

Han seier det ville vore reine galskap om dei sjølv hadde skote sin eigen sjåfør midt inne i jungelen.

- Det er jo ingen motivasjon eller motiv i det heile. Ein måtte vore suicidal for å gjere det, det er jo berre denne eine vegen. Vi var jo langt inne i landet, og hadde ingen moglegheiter for å komme oss unna, seier han.

Joshua French trur ikkje sjåføren var ein del av komplottet han meiner nordmennene vart utsette for. Kasongo vart eit uskyldig offer, meiner French.

(©NPK)

Joshua French uttaler seg no for første gong sidan han kom til Noreg 17. mai i fjor. Dette biletet vart tatt under rettssaka i Kinshasa i Kongo i 2014. Foto: Marte Christensen / NTB scanpix