Lillehammer kunne vore ribba før NM-finalane
Lillehammer var nær ved å måtte greie seg utan fleire av dei største stjernene sine i NM-finalane i ishockey mot Storhamar på grunn av utgåtte arbeidsløyve.
Det skriv Gudbrandsdølen Dagningen.
Sportssjef i klubben, Atle Svendsrud, oppdaga 19. mars, dagen før tredje semifinale mot Sparta, at arbeidsløyva til dei fem nordamerikanarane Joey Benik, Brendan Ellis, Brett Cameron, Stephan Vigier og David Morley var i ferd med å springe ut.
Dei har kontraktar på åtte månader som i utgangspunktet går ut 1. april, og det er den datoen UDI tar utgangspunkt i når utanlandske spelarar blir gitt opphalds- og arbeidsløyve før sesongen.
Svendsrud og styremedlem Nicolai Dolva jobba natt og dag for å ordne opp.
- Det var berre å legge trykk på styresmaktene for å få løyst situasjonen. Saksbehandlingstida er normalt slik at vi ikkje ville fått det til, men vi klarte det, seier Dolva til avisa.
- Det er relativt openbert at vi var i ein desperat situasjon. Samtidig var det berre vi to som visste om det, og det var blytunge dagar.
Lillehammer slo Sparta i fire strake kampar i semifinalen og møter nabo Storhamar i første finale tysdag 3. april. Det blir spelt best av sju kampar.
(©NPK)
Stephan Vigier var ein av fem Lillehammer-stjerner som kunne mista NM-finalane på grunn av arbeidsløyve som var gått ut, men det løyste seg på rekordtid, og trenar Sjur Robert Nilsen (til h,) kan disponere alle fem i kampane mot Storhamar. Foto: Fredrik Hagen / NTB scanpix