Maiken Caspersen Falla slått av Stina Nilsson på OL-sprinten

Maiken Caspersen Falla greidde ikkje å forsvare OL-tittelen, men hadde berre svenske Stina Nilsson framfor seg på sprinten i klassisk stil.

Falla hadde ryggen til Stina Nilsson etter den tøffe stigninga midtvegs, men den svenske utøvaren gleid frå i front i den neste utforkøyringa. Falla var sjanselaus i kampen om gullet, men måtte ta seg saman for å halde den russiske utøvaren Julija Belorukova bak seg i kampen om sølvet.

Falla var einaste norske løpar i finalen.

Heidi Weng gjekk i den andre semifinalen og hadde blant andre Jessica Diggins og dei russiske utøvarane Natalja Neprjajeva og Belorukova å kjempe mot. Ho vart frågått opp den siste tøffe stigninga og var sjanselaus til å ta seg vidare. Weng vart nummer seks og sist i sitt heat.

Kathrine Harsem og Ingvild Flugstad Østberg måtte seie takk for seg allereie i kvartfinalen.

Harsem gjekk i det første kvartfinaleheat mot blant Stina Nilsson. Svensken var best i kvalifiseringa tidlegare på dagen og var også suveren i sin kvartfinale. Harsem enda på fjerdeplass, og tida var for svak til å ta seg vidare som «lucky loser».

Østberg gjekk i den femte kvartfinalen. Ho hang godt med lenge, men også ho vart fråkøyrt i dei lettare partia og vart slått ut etter å ha staka seg inn til fjerdeplass. Ho fekk nøyaktig same tid som Harsem, og det var 1,78 sekund for sakte til å gå vidare.

Nilsson har tre sprintsigrar i verdscupen denne sesongen, men Falla leier sprintcupen åtte poeng framfor svensken. Falla var både regjerande olympisk og verdsmeister.

(©NPK)

Stina Nilsson (t.h.) frå Sverige vann, mens Maiken Caspersen Falla tok sølvet i klassisk sprint i OL tysdag. Foto: Lise Åserud / NTB scanpix