Lokalavisene er framleis svært viktige for folk i heile Noreg. Det viser nye opplagstal. Likevel, lokalavisa Midsundingen balanserer framleis på knivseggen i forhold til å motta pressestøtte. Opplagstala for Midsundingen i andre halvår i fjor viser at lokalavisa har 1.010 i opplag. Kravet for å få pressestøtte er minst 1.000 i opplag.
Opplagsveksten til lokalavisene held fram på landsbasis. Også i Møre og Romsdal går dei fleste avisene opp i talet på opplag. Lokalavisa Midsundingen er framleis den minste avisa i fylket, ut frå opplagstal, og opplaget gjekk tilbake med 24, frå første halvår 2022.
– Det er mange i øysamfunnet Midsund som abonnerer på lokalavisa Midsundingen. Med 1985 innbyggarar, i det som var Midsund kommune fram til og med 2020, er det imponerande å ha så mange abonnentar. Likevel, det er mange utflytta midsundingar som abonnerer på Midsundingen. Såleis er det alltid mogleg å få fleire til å abonnere på lokalavisa, og aller helst dei som bur her og ikkje abonnerer i dag. Det vil vere trist om avisa må legge ned på grunn av mangel på pressestøtte, seier redaktør Magne J. Krumsvik.
Landslaget for lokalaviser (LLA) og Mediebedriftenes Landsforening (MBL) la fram nye opplagstal for avisbransjen i dag, torsdag.
LLA sine over 100 medlemsaviser aukar totalopplaget med 1687, ein auke på 0,5 prosent. Akkurat som ved forrige telling, går om lag halvparten av LLA sine lokalaviser litt fram, den andre halvparten litt tilbake – når ein no samanliknar netto opplagstal for andre halvår 2022, med andre halvår året før. Den stabile trenden for lokalavisene strekkjer seg over lang tid.
Tomas Bruvik er generalsekretær i Landslaget for lokalaviser og er godt fornøgd med tala som vart lagt fram i dag.
– Folk lever jo livet sitt lokalt og lokalavisene lagar god og viktig journalistikk frå bygder, tettstader og bydelar landet rundt. Avisene våre følger folk frå vugge til grav. Undervegs løftar vi fram relevante nyheiter, kultur, idrett, næringsliv og ikkje minst det flotte lag- og organisasjonslivet, seier LLA sin generalsekretær, Tomas Bruvik.
Eidsvoll Ullensaker Blad er opplagsvinnaren mellom LLA sine lokalaviser. Avisa sitt netto-opplag er nå 7.255, ein auke på 800! Avisa sin redaktør, Bjørn Inge Salberg Rødfoss ,kommenterer den flotte veksten slik.
– Eidsvoll Ullensaker Blad har vore gjennom ein rivande utvikling dei siste åra. Vi har hatt stort fokus på digitalt først, og dette har vore svært viktig for den veksten vi ser i dag. Opplagstala er for oss ein fin og viktig løypemelding på den jobben som gjerast av alle på huset kvar einaste dag. Det siste året ser vi at avisa har auka andelen digitale abonnentar med over 31 prosent, seier Salberg Rødfoss.
Hallingdølen (+539), Sandnesposten (+539), MittKongsvinger (+465) og Meråkerposten (+453) er mellom dei andre lokalavisene som gjer det veldig godt det siste året. Avisa Lofoten har ein flott prosentvis framgang (+46 %). LLA sine aviser har no eit totalopplag på 369.135.
Sjå også www.lla.no for meir informasjon om LLA og lokalavisene.