Namna frigitte etter flyulukka i Svolvær

Det var Leif Jarle Stamnes (79) frå Tromsø og Einar Halvorsen (63) frå Langhus i Ski som mista livet i småflyulukka i Svolvær søndag kveld.

Politiet i Svolvær gjekk måndag ettermiddag ut med namna på dei to omkomne i samråd med dei pårørande. Samtidig seier politiet at dei ønskjer å komme i kontakt med eventuelle augnevitne.

Dei to mista livet då småflyet dei sat i styrta i sjøen ved Svolvær like etter at flyet tok av frå Svolvær lufthamn Helle klokka 20.30 søndag kveld.

Flyet var av typen Piper PA-28 og politiet håpar dei kan byrje hevinga av vraket, som ligg på 60-70 meters djupne, tysdag eller onsdag.

(©NPK)

Det var Leif Jarle Stamnes (79) frå Tromsø og Einar Halvorsen (63) frå Langhus som omkom då dette flyet styrta i sjøen i Svolvær søndag kveld. Foto: Lars Christian Hansen / NTB scanpix