Norwegian testar ut betaling for å komme først i køen
Ved fire flyplassar på Sør- og Vestlandet testar Norwegian no ut ei avgift for reisande som er villige til å betale for å få komme først inn i flya.
Den nye ordninga er innført på flyplassane i Ålesund og Molde, og i Haugesund og Kristiansand. Ifølgje nettavisa Flysmart24 får reisande som ønsker det, moglegheita til å betale rundt fem euro - i underkant av ein femtilapp - for å få prioritet ved ombordstiging i flya.
Ordninga kan bli utvida til å gjelde heile Norwegians rutenett dersom det viser seg at det er ein marknad for dette.
- No skal vi teste det ut på utvalde flyplassar, og dersom det er vellykka vil vi sjå ei gradvis utrulling, seier kommunikasjonssjef Lasse Sandaker-Nielsen i Norwegian.
Det irske lågprisflyselskapet Ryanair har i mange år allereie praktisert såkalla priority boarding. Men ordninga er blitt kritisert fordi så mange betaler for å komme tidleg om bord at det kjennest bortkasta.
(©NPK)
Illustrasjonsfoto: Håkon Mosvold Larsen / NTB scanpix