OL-sølv til Krüger på 15 kilometeren då suverene Cologna tok gull
Simen Hegstad Krüger gjekk inn til OL-sølv på 15 kilometer fri teknikk, men kunne gjere lite med Dario Cologna som tok gullet.
Etter at dei norske langrennsgutane tapetserte sigerspallen i skiathlon søndag var forventningane store. Endå ein gong leverte Simen Hegstad Krüger eit kjempeløp, men han kunne gjere lite med sveitsiske Dario Cologna, som vann på tida 33.43,9.
Krüger gjekk inn 18,3 sekund bak Cologna, medan Denis Spitsov (OAR) tok bronse 23 sekund bak vinnaren.
Alle dei norske var med i tetsjiktet ved første passering på 1,6 kilometer, men bak kom ein sveitsar i superform. Etter seks kilometer leidde Cologna med elleve sekund på beste norske, og avstanden hadde auka til 25 sekund etter 9,8 kilometer.
Halvannan kilometer før mål var det klart at det gjekk mot ein sekundstrid om medaljane, der Simen Hegstad Krüger og Martin Johnsrud Sundby i høgste grad var med i kampen. Colognas leiing var krympa til 19 sekund, men kreftene heldt heilt inn for sveitsaren.
Martin Johnsrud Sundby og Hans Christer Holund fekk det tøft mot slutten av løpet, og gjekk inn til høvesvis fjerde- og femteplass, 24,9 og 34,5 sekund bak Cologna.
Finn Hågen Krogh møtte tidleg veggen og gjekk inn til 18.-plass, halvtanna minutt bak.
(©NPK)
Simen Hegstad Krüger gjekk til sølv på 15 kilometer fri teknikk fredag. Foto: Terje Pedersen / NTB scanpix