Politiet etterforskar russtifting i Bergen

Politiadvokat Torunn Strand ved økonomiavsnittet i Vest politidistrikt bekreftar overfor VG at avgjerda om å starte etterforsking av Stiftelsen Ordet vart tatt tysdag denne veka.

Etterforskinga skjer på bakgrunn av at Lotteri- og stiftelsestilsynet bestemte seg for å melde den familiedrivne stiftinga dagen etter VG-avsløringa om at dei hadde tent millionar av kroner ved å sende rusmisbrukarar og kenyanarar ut på gata med innsamlingsbøsser.

Frå 2000 til 2016 rekneskapsførte den ideelle stiftinga inntekter på 25 millionar kroner, ifølgje avisa. Pengane skulle gå til førebygging, avrusing og ettervern av rusmisbrukarar, men VG avslørte at styreleiaren hadde overført 2,3 millionar kroner til sin private konto 9. november. Same dag bestemt Stiftelsestilsynet å fjerne han, kona hans og stedottera frå styret.

Etter dette vart advokat Bjørn Åge Hamre utnemnt som ny styreleiar. Han seier han er glad for etterforskinga, og understrekar samtidig at stiftinga vil sjå nærmare på banktransaksjonar VG omtalte denne tysdagen. Dei gjekk ut på trygdeytingane til ein person som skulle få rusbehandling hos stiftinga fleire gonger vart vidaresende til ein konto som stod oppført på stedottera som sat i det avsette styret.

- Stiftinga ser fram til politietterforskinga og håpar å få avklart fakta i saka. I lys av alvoret i mistankane som er reist, er det svært positivt at politiet prioriterer saka, seier Hamre.

VG har ikkje fått kontakt med advokat Erlend Øen, som representerer det avsette styret i Stiftelsen Ordet.

(©NPK)