Premier League-klubbane brukte 2,3 milliardar på agenthonorar
Det er gullkanta business å vere agent for ein fotballspelar. Spesielt dersom agenten får klienten sin til Premier League.
I overgangsvindauga sommaren 2017 og januar 2018, har agentar totalt kunne putte rundt 2,3 milliardar norske kroner i lommene for å ha spelt ei rolle i spelarovergangar til Premier League.
Det er ein auke på rundt 387 millionar kroner frå førre sesong. Det skriv den britiske avisa The Guardian. Tala stammar frå innrapporteringane frå klubbane til det engelske fotballforbundet (FA).
I tillegg til dei mangfaldige millionane agentane tener på spelarovergangar når deira klientar byter klubb, får dei vanlegvis også ei del av lønna til spelaren i fast honorar.
Liverpool, Chelsea og Manchester City har vore dei mest gåvmilde til fotballmellommennene.
Dei tre klubbane har betalt høvesvis 307 millionar, 276 millionar og 254 millionar til agentar i samband med spelarhandlar.
Alle dei tre klubbane har kjøpt spelarar for enorme summar denne sesongen, blant anna Virgil van Dijk, Álvaro Morata og Kyle Walker.
Det er ikkje offentleggjort kor mykje klubbane har betalt agentar for spesifikke handlar, men kor mykje pengar dei har brukt på agenthonorar totalt.
(©NPK)
Virgil van Dijks agent sat igjen med ein god slump pengar etter overgangen til Liverpool frå Southampton. Foto: AP Photo/Rui Vieira / NTB scanpix.