Puigdemont lauslaten mot kausjon
Den tidlegare katalanske regionpresidenten Carles Puigdemont er lauslaten mot kausjon i Tyskland.
Tysk påtalemakt gav ordre om å sette fri Puigdemont fredag formiddag etter at han hadde skaffa kausjonen på 75.000 euro.
I forkant av kunngjeringa hadde Puigdemont sjølv tvitra frå fengsel.
- Vi må sjå framover med håp og optimisme, fordi vi har ein rett til å ikkje la dei stele vår framtid. Vi må halde stand og ikkje gi etter, tvitra han på katalansk, med emneknaggen #FreeCatalanPoliticalPrisoners.
Puigdemonts pressekontor opplyste samtidig at han klokka 18 fredag kveld skal halde pressekonferanse i rådhuset i Neumünster i den tyske delstaten Schleswig-Holstein, der han har sete i varetekt etter arrestasjonen ved grensa mellom Danmark og Tyskland 25. mars.
Arrestasjonen kom som følgje av ein europeisk arrestordre sendt ut av ein spansk dommar.
(©NPK)
Carles Puigdemont vart avsett som regionpresident i Catalonia i oktober og flykta til sjlølvvalgt eksil i Belgia. Der har han budd sidan. I slutten av mars besøkte han Finland der han blant anna heldt foredrag, og på veg tilbake frå Finland til Belgia, via Danmark, vart han stoppa på grensa til Tyskland. Foto: AP / NTB scanpix