Riiber kjempa om OL-medalje, men vart nummer fire
Jarl Magnus Riiber kjempa om OL-medalje i kombinertrennet i normalbakke, men enda til slutt på 4.-plass. Eric Frenzel tok eit nytt OL-gull.
Riiber hadde medalje i blikket då han la ut på langrennsdelen over 10 kilometer i OL-kombinertrennet, men enda på den sure fjerdeplassen.
Den norske OL-debutanten starta etter sin 2.-plass i hopprennet 15 sekund bak Franz-Josef Rehrl frå Austerrike. Riibers plan var å henge seg på halen av den gruppa utøvarar han såg for seg i langrennsløypa.
- Forhåpentlegvis heng eg med heilt inn, og då kan eg bli farleg, sa 20-åringen etter hoppdelen.
Planen følgde han til punkt og prikke, og det var berre på den siste kilometeren det vart for tøft for Riiber. Etter 2,5 kilometer låg han side om side med austerrikaren, mens Espen Andersen hadde redusert forspranget frå 54 til 24 sekund.
Halvvegs i løpet var regjerande OL-meister Eric Frenzel i tet. Riiber låg i rygg saman med japanske Akito Watabe og Lukas Klapfer frå Tyskland. Andersen på si side begynte å merke køyret, og sekunda til tet hadde auka til 34. Det berre auka utover i løpet.
Etter 7,5 kilometer såg det ut som medaljane skulle stå mellom dei fire. Då det så ut til å bli i tøffaste laget for Riiber beit han saman tennene og klamra seg fast til dei to tyskarane og japanaren. Men mot slutten tok kreftene slutt, og Riibe gjekk inn til 4.-plass 22,5 sekund bak den tyske vinnaren.
Watabe tok sølv, 4,8 sekund bak Frenzel, mens Klapfer knep bronsen, 18,1 bak landsmannen.
Espen Andersen gjekk inn til 10.-plass, 1.13,7 minutt bak vinnaren.
(©NPK)
Jarl Magnus Riiber vart nummer fire i OL-rennet i kombinert onsdag. Foto: Terje Pedersen / NTB scanpix