Russland antydar at Storbritannia stod bak giftangrep
Russland ser på angrepet på Sergej Skripal og dotter hans som ein del av ein «storslått politisk provokasjon».
Det skriv utanriksdepartementet i landet i ei pressemelding onsdag.
Der blir det hevda at «Storbritannia ikkje er interesserte i å identifisere dei eigentlege årsakene og dei eigentlege bakmennene» i samband med giftangrepet i Salisbury 4. mars.
«Dette tyder på mogleg involvering frå etterretninga i Storbritannia. Om vi ikkje får bevis på det motsette, kjem vi til å sjå på hendinga som eit drapsforsøk mot russiske statsborgarar, og som ein del av ein storslått politisk provokasjon», heiter det vidare i meldinga.
Fråsegna frå russisk hald kjem etter at ei lang rekke vestlege land har varsla utvisingar av russiske diplomatar. Utvisingane er ein reaksjon på attentatet i Salisbury, som britiske styresmakter meiner Russland stod bak.
Storbritannia har blant anna vist til at den sovjetisk-utvikla nervegifta Novitsjok blei brukt i angrepet på eks-spionen Sergej Skripal og dotter hans.
Regjeringa i Noreg har gitt uttrykk for full tillit til den britiske etterforskinga. Måndag avgjorde regjeringa å utvise ein russisk diplomat som følgje av hendinga.
- Vår oppleving er at britane har levert god dokumentasjon, sa statsminister Erna Solberg (H) tysdag til NTB.
(©NPK)
Det russiske utanriksdepartementet antydar at Storbritannia kan ha vore involvert i nervegiftangrepet på Sergej Skripal og dotter hans. Bildet viser utanriksminister Sergej Lavrov i Moskva tidlegare denne månaden. Foto: AP/NTB scanpix