Straumnettselskap frifunne i rettssak etter skogbrann
NTE Nett er frifunne i rettssaka etter ein stor lyngbrann i Flatanger i Trøndelag i 2014. Kravet mot nettselskapet og Gjensidige var på 80 millionar kroner.
Dommen i det sivile søksmålet fall i Namdal tingrett, opplyser NTE Nett AS sjølv i ei pressemelding måndag. Bak regresskravet mot nettselskapet og deira forsikringsselskap Gjensidige stod fleire andre forsikringsselskap.
- Vi er tilfredse med avgjerda i tingretten om frifinning. Dommen viser at ansvaret for brannen ikkje kan leggjast på NTE Nett. Dette er i samsvar med det vi hevda heile tida. Det var heilt ekstraordinære vêrforhold, med langvarig sterk vind, låge temperaturar og tørke i januar 2014. Dette førte til at vegetasjonen vart ekstremt tørr, og at brannen utvikla seg til ein katastrofe, seier administrerande direktør Trygve Kvernland i NTE Nett.
55 bygningar vart totalskadde og 70 personar vart heimlause i brannen i januar 2014. Den starta etter at NTE Nett hadde drive vedlikehaldsarbeid ved sine straumlinjer. Politiet slo i ettertid fast at selskapet ikkje kunne klandrast og la bort saka.
Dommen er førebels ikkje rettskraftig.
(©NPK)
Den omfattande lyngbrannen braut ut i januar 2014. Arkivfoto: Ned Alley / NTB scanpix