Studentar henta Listhaug-kunstverk midt på natta
Studentar frå eit studentkollektiv sneik seg ut midt på natta og tok med seg det omdiskuterte kunstverket med ei korsfesta Sylvi Listhaug. No er det reparert.
Ved hjelp av fire flasker naglelakkfjernar har studentane i tillegg klart å fjerna den svarte spraymålinga som natt til onsdag blei spraya over biletet, skriv Bergens Tidende.
Dermed kan ein trygt seia at biletet av den korsfesta Sylvi Listhaug har stått opp att.
Det var gatekunstnaren AFK som stod bak biletet som blei malt på eit lerret som blei limt fast på ei inngangsdør på hjørnet av Fosswinckels gate i Bergen natt til andre påskedag.
Biletet viser Listhaug med tornekrans hengt opp på eit kors. Ved beina hennar er det stilt opp mikrofonar, og i bakgrunnen er det malt slagord som «mass surveillance» og «Jemen». Også eit hakekors er malt inn i biletet.
Biletet har vekt sterke reaksjonar og natt til onsdag blei det altså spraya over med svart måling.
Men no heng det på veggen i eit studentkollektiv i Bergen sentrum og er tilbake i nesten den opphavlege utgåva si. Ifølgje avisa er måleriet ikkje like klart som då det først kom opp, men detaljar som Frp-tatoveringa på skulera til Listhaug er framleis tydeleg.
(©NPK)
Natt til onsdag blei gatekunstverket av Sylvi Listhaug i Bergen malt over med spraymåling. No har nokre studentar henta det heim til eit kollektiv og oppretta det på nytt ved hjelp av fire flasker naglelakkfjernar.
Foto: Emil Weatherhead Breistein / NTB scanpix