Studie: Lite mindretal står bak vekst av hatske ytringar på nettet
Eit lite mindretal av nettbrukarane er ansvarleg for ein stor del av hatske utfall på internett, viser ein analyse av fleire tusen innlegg og kommentarar.
Rundt halvparten av talet på likes til hatske kommentarar på Facebook blei skapt av berre rundt 5 prosent av Facebook-brukarkontoane, ifølgje studien som er gjort av IT-ekspert Philip Kreissel og med bistand frå Institute for Strategic Dialogue i London.
25 prosent av alle likes kunne sporast tilbake til berre 1 prosent av alle Facebook-profilane, viser studien.
Analysen viser at det dreier seg om svært aktive brukarar som ofte går i flokk i diskusjonar der hatefulle utsegner utspelar seg. Dei same brukarane er svært passive i andre diskusjonar.
- Høgrevridde grupper prøver målbevisst å manipulere Facebook-algoritmane. Dei bestemmer seg for tidspunkt og emneknaggar som gjer dei i stand til å kaste seg inn på lista over dei mest framståande sakene, seier Julia Ebner til den tyske kringkastaren NDR.
Studien er basert på rundt 3.000 innlegg og 18.000 kommentarar.
(©NPK)
Illustrasjonsfoto: AP / NTB scanpix