Trenaren til Fourcade gir seg
Stéphane Bouthiaux gir seg som trenar for Martin Fourcade og resten av det franske landslaget i skiskyting.
To dagar etter 52-årsdagen sin bekrefta Bouthiaux onsdag opplysningar i avisa L'Equipe om at han vel å gi seg etter 11 år som landslagstrenar for Frankrike.
Særleg knytast perioden hans til den eventyrlege suksessen til Fourcade. 29-åringen har i dei to siste OL samla fem gull og to sølv. Dessutan har Fourcade sikra seg alle fem individuelle samanlagttrofé i verdscupen kvart av dei tre siste åra. Denne sesongen var han på pallen i alle verdscuprenn unntatt det aller siste.
Skiskyttarforbundet til Frankrike har enno ikkje offisielt stadfesta avgangen til Bouthiaux.
(©NPK)
Martin Fourcade med samanlagttrofeet i verdscupen skiskyting. Franskmannen får ny trenar på landslaget etter at Stephane Bouthiaux vel å gi seg. Foto: Sergej Grits, AP / NTB scanpix