Udnes Weng-tvillingane forsvarte NM-gullet
Tiril og Lotta Udnes Weng frå Nes hadde små problem med å forsvara gullet på lagsprinten under NM del 2 i langrenn i Alta torsdag.
21-åringane gjekk kontrollert på dei fire første rundane i fri teknikk, men så sette Tiril opp farten på den siste runden sin og sende søstera Lotta ut på ankeretappen med 5,2 sekunds leiing på Silje Øyre Slind frå Oppdal.
I mål var avstanden 4,7 mellom Nes og Oppdal. For Oppdal gjekk søstera til Silje, Kari, den første etappen.
- Det var spennande. Lotta fekk ikkje den store luka frå meg. Det er ekstra gøy å vinna eit gull for klubben min, og det er også artig at vi er tvillingar, sa Tiril Udnes Weng til NRK.
- Lagsprint i fri teknikk er det kanskje den øvinga som passar oss best, sa ankerkvinna Lotta Udnes Weng.
- Vi er kjempenøgde. Målet var å halda med heilt inn til mål, men det klarte vi ikkje, sa Silje Øyre Slind frå Oppdal etter sølvplassen.
Saman med søstera Astrid tok Silje og Kari Øyre Slind gull i stafett under NM i Røros i 2015.
Ingvild Flugstad Østberg spurta Gjøvik inn til 3.-plass, men var solide 13,0 sekund bak.
Kathrine Harsem kom i mål tidelen bak på 4.-plass for Varden Meråker.
Lillehammer, Kvaløysletta, Strindheim og Gjerdrum kom inn på dei fire neste plassane.
(©NPK)