Veslebror Even trur Petter Northug held fram

- Vi får sjå kva som skjer. Håpet er å få Petter til å bli med vidare. Eg trur han held fram, seier veslebror Even Northug til NTB.

Team Northug har ikkje villa røpa om Petter Northug held fram. Hovudpersonen sjølv har halde seg taus. 32-åringen klarte ikkje å kvalifisera seg til OL. Manglande motivasjon har blitt opplyst som grunnen til at han ikkje går nokon av dei resterande renna i verdscupen, heller ikkje sprinten i Drammen onsdag.

Denne sesongen har Northug berre gått eitt verdscuprenn, og det var sprinten i Lillehammer i byrjinga av desember.

Pressar på

Even Northug er uansett positiv. Han fortel om ein god formkurve og ein god treningsstim hos storebroren. Han ser positivt på sjansane for å sjå Petter Northug på startstreken i 2018/2019-sesongen.

- Forma til Petter verkar bra om dagen. Det er eit godt teikn, seier 22-åringen.

- Pushar du på for å få han til å bli med vidare?

- Eg pushar han heile tida, eg gjer det, seier han og smiler lurt.

- Så viss du skulle tippa i dag ...?

- Da heller eg mot ja, at Petter held fram. Det er ingen tvil om det.

Til kvarten

Even Northug tok seg vidare til kvartfinalen frå sprintprologen i Drammen, der Johannes Høsflot Klæbo var klart raskast. Utslagsrundane går seinare onsdag ettermiddag.

- Eg trefte litt dårleg teknisk, men det var ekkelt føre. Vi får sjå korleis det går, seier Even Northug.

- Korleis vurderer du inneverande sesong, og vegen vidare, for eigen del?

- Eg er ganske nøgd. Eg har fått lov til å gå ein del verdscup, så det er bra. Neste sesong er det skøytesprint i VM, det ligg i bakhovudet. Det er målet å vera med der, svarar 22-åringen.

(©NPK)

Petter Northug har ikkje hatt ein minneverdig sesong. No knyter spenninga seg til om han held fram i 2018/2019.
Foto: NTB scanpix

Even Northug, her i aksjon under verdscupsprinten i Drammen onsdag.
Foto: Terje Pedersen / NTB scanpix