Vilde Nilsen tok sølv i langrennssprint: - Det betyr så utruleg mykje

Vilde Nilsen (17) gjekk onsdag inn til sølv på langrennssprinten for ståande under Paralympics i Pyeongchang.

Den norske jenta gjekk ut 17 sekund bak første utøvar ut på grunn av handikap, men det tok ikkje lang tid før 17-åringen hadde kontakt med feltet.

Inn mot mål vart det kamp om medaljane, men ingen kunne gjere noko med russiske Anna Milenina som passerte først over mållinja, 3,1 sekund framfor Nilsen.

Bak kom canadiske Natalie Wilkie i stor fart og trua den norske sølvmedaljen, men Nilsen vart klokka inn ein tiandedel framfor Wilkie.

- Det kjennest heilt fantastisk, eg veit ikkje heilt korleis eg skal klare å beskrive det. Det betyr så utruleg mykje. Eg er berre kjempeglad, seier Nilsen til NRK.

- Eg hadde aldri trudd eg skulle stå her i dag og få denne sølvmedaljen i Paralympics, det er bekreftar at så lenge ein står på så kan ein lykkast, seier den lykkelege sølvmedaljevinnaren vidare.

Andre nordmenn

I sprintlangrenn for kvinner 1,1 kilometer sitjande vart det stopp i semifinalen for Birgit Skarstein. Berre 1,3 sekund skilde Jarstein frå ein plass i finalen.

Eirik Bye enda sist i finalen i 1,5 kilometer sprint for synshemma. Bye gjekk inn 29,5 sekund bak den canadiske vinnaren Brian McKeever.

Her tok svenske Zebastian Modin sølv, 2,5 sekund bak, mens Jake Adicoff tok bronsen. Amerikanaren kom i mål 9,5 sekund bak McKeever.

Håkon Olsrud kvalifiserte seg til semifinalen i 1,5 kilometer klassisk langrennssprint for ståande. Der vart han nummer fire, over seks sekund bak den tredje og siste finaleplassen i heatet. Johannes Birkelund klarte ikkje kvalifisere seg til semifinalen.

Trygve Steinar Larsen måtte bryte kvalifiseringsrunden i 1,1 kilometer langrennssprint for sitjande.

(©NPK)

Noregs Vilde Nilsen gjekk onsdag inn til sølv på langrennssprint for ståande under paralympics i Pyeongchang i Sør-Korea. Foto: Jessica Gow/TT / NTB scanpix