Waaler løfta til femteplass i EM
Sol Anette Waaler blei nummer fem i 58-kilosklassen under EM vektløfting i Bucuresti onsdag. Latviske Rebeka Koha vann overlegent.
Waaler løfta 80 kilo i rykk og 99 i støyt. Med 179 kilo totalt hadde ho berre fire løftarar framfor seg.
Koha var suverent best både i rykk (100 kilo) og støyt (120). Med 220 kilo til saman var ho 29 framfor den svenske sølvvinnaren Angelica Roos, som løfta 191 (85-106).
Koha lukkast med alle dei seks løfta sine i konkurransen. Sjølv opningsvektene ville gitt henne siger både i rykk, støyt og samanlagt.
Dei rumenske heimefavorittane Andreea Penciu (190 kilo) og Maria Luana Grigoriu (187), som begge er juniorar, var dei andre som slo Waaler. Den norske løftaren slo finske Jenni Puputti med ein kilo og blei nest beste nordiske utøver.
(©NPK)